Kurti në Paris: Integrimi i Ballkanit në BE, çelës për një Evropë më të fortë

29.10.2025

Kryeministri në detyrë i Kosovës, Albin Kurti, ndodhet këto ditë në Paris, ku po merr pjesë në Forumin e Paqes dhe takime të tjera ndërkombëtare.

Dje pasdite, para fillimit të forumit, Kurti mori pjesë në një diskutim të organizuar nga instituti i njohur francez Jacques Delors.

Tema kryesore ishte situata gjeopolitike në Evropë dhe ndikimi i Ballkanit Perëndimor, por në tryezë u trajtuan gjithashtu çështje të mbrojtjes, të drejtave të njeriut, përfshirë të drejtat e pakicave, si dhe zhvillimet e fundit në Kosovë.

Në këtë diskutim mori pjesë edhe i dërguari i posaçëm i Ministrisë së Punëve të Jashtme të Francës për Ballkanin Perëndimor, René Troccaz.

Ndërkaq, në mbrëmje, gjatë darkës së shtruar nga Qarku Diplomatik i Parisit, kryeministri Kurti theksoi rëndësinë e solidaritetit dhe bashkëpunimit ndërmjet shteteve dhe shoqërive, si dhe nevojën për bashkëdyzim të vlerave evropiane dhe interesave shtetërore.

Ai shtoi se anëtarësimi i Ballkanit Perëndimor në Bashkimin Evropian është në interesin ekonomik dhe të sigurisë të vetë BE-së dhe shteteve anëtare të tij.

Vizita e kryeministrit Kurti në Paris thekson angazhimin e Kosovës në forumet ndërkombëtare dhe rëndësinë që vendi i jep forcimit të marrëdhënieve diplomatike dhe perspektivës evropiane të rajonit.