Kurti hesht për marrëveshjen me LDK-në: “Bashkëpunimi” mbetet fjala kyçe

19.06.2026

Kryeministri në detyrë i Kosovës, Albin Kurti, nuk ka dhënë përgjigje konkrete lidhur me mundësinë e një koalicioni mes Lëvizjes Vetëvendosje dhe Lidhjes Demokratike të Kosovës pas zgjedhjeve të 7 qershorit.

I pyetur nga gazetarët për një bashkëpunim të mundshëm me partinë opozitare, Kurti zgjodhi të mos komentojë drejtpërdrejt, duke u përgjigjur vetëm me një urim për Ditën Ndërkombëtare të Shërbimit Publik.

Megjithatë, ditëve të fundit, Kurti ka lënë të kuptohet se për formimin e institucioneve të reja nevojitet një qasje më bashkëpunuese nga partitë politike. Ai ka deklaruar se do të kërkojë mbështetje për çështjet që lidhen me funksionalizimin e institucioneve, përfshirë edhe zgjedhjen e presidentit të ri.

Lëvizja Vetëvendosje doli fituese në zgjedhjet parlamentare dhe, sipas rezultateve të fundit, ka siguruar 53 ulëse në Kuvendin e Kosovës. Kjo i jep mundësi për formimin e qeverisë me mbështetjen e deputetëve të komuniteteve joshumicë, por për zgjedhjen e presidentit kërkohet një shumicë më e gjerë parlamentare.

Tashmë vëmendja është përqendruar te negociatat politike dhe qëndrimi i partive opozitare për hapat e ardhshëm institucionalë.