Kryeministri Kurti bën homazhe në Prekaz për 33-vjetorin e sulmit të parë ndaj familjes Jashari dhe në Ditën e Veteranëve
Me rastin e Ditës së Veteranëve të UÇK-së dhe 33-vjetorit të sulmit të parë nga policia serbe ndaj familjes Jashari, Kryeministri i Kosovës, Albin Kurti, vizitoi sot Prekazin historik.
Në këtë vend simbol të qëndresës dhe sakrificës për lirinë e Kosovës, Kryeministri bëri homazhe tek varrezat e familjes Jashari.
Ceremonia u nis me një minutë heshtje për nder të dëshmorëve dhe të rënëve të luftës, duke shprehur respektin e thellë për sakrificën e familjes Jashari dhe gjithë atyre që dhanë jetën për lirinë e vendit.
Përmes një postimi në rrjetet sociale, Kryeministri Kurti ndau emocionet e tij, duke shkruar:
“Në shënim të Ditës së Veteranëve të UÇK-së dhe 33-vjetorit të sulmit të parë të policisë serbe ndaj familjes Jashari, vizituam Prekazin historik. Lavdi të gjithë dëshmorëve dhe të rënëve të luftës!”
Kjo vizitë përbën një akt simbolik për nderimin e të kaluarës heroike të Kosovës dhe përkujtimin e sakrificave të panumërta që u bënë për lirinë dhe pavarësinë e vendit. Familja Jashari, si një nga emblemat më të ndritura të luftës çlirimtare, mbetet një burim frymëzimi për brezat e ardhshëm.
Dita e Veteranëve të UÇK-së dhe kujtimi i 33-vjetorit të sulmit të parë ndaj familjes Jashari janë një moment reflektimi për të gjithë qytetarët e Kosovës, për të vlerësuar kontributin e çdo luftëtari që luftoi për lirinë dhe dinjitetin e vendit.