Krasniqi pas takimit me Kurtin: I kërkova një figurë të pranueshme për kryetar të Kuvendit
Kryetari i Partisë Demokratike të Kosovës (PDK), Memli Krasniqi, pas takimit të zhvilluar sot me kreun e Lëvizjes Vetëvendosje (LVV), Albin Kurti, ka deklaruar se i ka kërkuar këtij të fundit një “figurë të pranueshme” për postin e kryetarit të Kuvendit të Kosovës.
Krasniqi tha se gjatë takimit kanë shkëmbyer “ide dhe diskutime sa i përket konstituimit të Kuvendit”, duke theksuar se PDK nuk i është shmangur asnjëherë dialogut dhe diskutimeve me palët e tjera politike.
“Nuk besoj që ka ndryshuar si situatë, por që ta dinë edhe të tjerët, Partia Demokratike e Kosovës, asnjëherë në të kaluarën e as sot nuk i heziton dialogut edhe diskutimeve me këdo”, u shpreh Krasniqi pas takimit.
Ai theksoi nevojën për konstituimin sa më të shpejtë të Kuvendit, por paralajmëroi se kandidati për kryetar “nuk mund të imponohet”.
“Edhe z.Kurti i thashë që do të ishte mirë me menduar për kandidatë apo kandidatura të tjera”, shtoi Krasniqi.
Lidhur me postin e nënkryetarëve të Kuvendit, kreu i PDK-së ishte i prerë duke thënë se ato “as që diskutohen”, duke i konsideruar si “çështje të ndara”.
Deklaratat e Krasniqit lënë të kuptohet se pozicioni i PDK-së mbetet i njëjtë, duke mos ofruar mbështetje për kandidaten e LVV-së, Albulena Haxhiu, dhe duke kërkuar një emër tjetër konsensual për të zhbllokuar procesin e konstituimit të Kuvendit. Mbetet të shihet në ditët në vijim nëse ky takim do të sjellë ndonjë përparim drejt zgjidhjes së ngërçit politik.
Dardan Berisha bën thirrje për unitet në PDK: Interesi i partisë duhet të jetë mbi ambiciet individuale