KESCO kërkon shtrenjtimin e rrymës për 88 përqind

Kompania Kosovare për Furnizim me Energji Elektrike (KESCO) ka kërkuar shtrenjtimin e tarifave të rrymës, e këtë propozim për tarifat e reja të energjisë elektrike e ka dorëzuar më 12 gusht në Zyrën e Rregullatorit për Energji (ZRRE).

Ky propozim për tarifa të reja të rrymës do ta shtrenjtonte çmimin e saj deri në 88 për qind për amvisëritë, ndërsa deri në 70 për qind për bizneset.

Ndërkaq, vendimi i Zyrës së Rregullatorit për Energji lidhur me këtë kërkesë të KESCO-s pritet të merret brenda 20 ditëve të punës.

Sipas REL, tarifa e ulët për konsumatorët që shpenzojnë nën 800 kilovat në orë, nga 2.89 cent është propozuar të bëhet 5.43, ndërsa tarifa e lartë nga 6.75 në 12.86 cent.

Ndërkaq, për konsumatorët që shpenzojnë mbi 800 kilovat, KESCO ka propozuar që tarifa e ulët nga 5.90 cent të rritet në 11.09 cent, derisa tarifa e lartë nga 12.52 cent në 23.53 cent.