Holanda bllokon përparimin e Serbinë drejt BE-së: Kërkon normalizim me Kosovën
Ministri i Jashtëm holandez, Caspar Veldkamp, njoftoi të hënën se Holanda do të bllokojë hapin e ardhshëm të Serbisë në rrugën e saj drejt Bashkimit Evropian.
Foto: Ilustrim
Vendimi u mor pas shqetësimeve të vazhdueshme për mungesën e përparimit të Serbisë në disa fusha kyçe, përfshirë sundimin e ligjit, marrëdhëniet me Kosovën dhe harmonizimin e politikës së jashtme serbe me atë evropiane.
“Ne shohim se nuk ka përparim të mjaftueshëm në fushën e sundimit të ligjit në Serbi,” deklaroi Veldkamp pas një takimi të ministrave të jashtëm të BE-së, raporton NL Times. Ai shtoi se Serbia mban përgjegjësi për mungesën e progresit në normalizimin e marrëdhënieve me Kosovën, si dhe për mosrespektimin e politikave të përbashkëta të BE-së, përfshirë vendosjen e sanksioneve ndaj Rusisë.
Një nga çështjet kyçe që shqetëson Holandën dhe disa vende të tjera të BE-së është refuzimi i Serbisë për të njohur pavarësinë e Kosovës. Beogradi e konsideron ende Kosovën si një krahinë autonome, një qëndrim që bie ndesh me përpjekjet për normalizim të marrëdhënieve mes dy palëve. Po ashtu, Serbia ka refuzuar t’i bashkohet sanksioneve kundër Rusisë, një kërkesë e përsëritur nga shtetet anëtare të BE-së për të harmonizuar politikat e saj të jashtme me ato evropiane.
Veldkamp bëri thirrje që edhe shtetet e tjera të BE-së të mbështesin qëndrimin e Holandës për të rritur presionin ndaj Serbisë. “Ne me të vërtetë duam të ushtrojmë presion mbi Serbinë tani,” tha ai, duke theksuar se sundimi i ligjit është një shtyllë themelore për procesin e zgjerimit të BE-së.
Ai paralajmëroi se, për të parandaluar dobësimin e BE-së, duhet të vendosen standarde të larta për vendet kandidate. “Duke parë zhvillimet alarmante në Hungari dhe pjesërisht në Sllovaki, është logjike që të kërkojmë reforma serioze nga Serbia në fushën e sundimit të ligjit,” theksoi Veldkamp.
Deri më tani, Serbia ka hapur 22 nga 35 kapitujt e negociatave të anëtarësimit me BE-në dhe ka mbyllur përkohësisht vetëm dy prej tyre. Komisioni Evropian, në raportin e tij të fundit për zgjerimin, ka theksuar rëndësinë e reformave në sundimin e ligjit, normalizimin e marrëdhënieve me Kosovën dhe harmonizimin e politikës së jashtme të Serbisë me atë të BE-së.
Përveç Holandës, edhe disa vende të tjera të BE-së, përfshirë Kroacinë, Bullgarinë dhe shtetet baltike, kanë kundërshtuar hapjen e kapitujve të rinj në negociatat me Serbinë.
