Afati i dytë i testit të Maturës mbahet me 10 tetor

Në testin e maturës i cili u mbajt më 29.08.2020, ku janë nënshtruar rreth 26.000 nxënës në tërë Kosovën, rezultatet e këtij testi janë publikuar pas më pak se 10 ditësh, ku është bërë e ditur se testin e kanë kaluar 17.105 nxënës.

Ministria e Arsimit dhe Shkencës ka bërë të ditur se Këshilli Shtetëror i Maturës (KShM) ka mbajtur sot takimin e radhës ku është diskutuar për afatin e dytë të Maturës Shetërore 2020 dhe është vendosur që data 10 tetor 2020 të jetë dita e mbajtjes së Testit të Maturës për afatin e dytë.

Gjithashtu, Kryetari i KShM, Gëzim Berisha, ka bërë të ditur se nga data 15-24 shtator, maturantët e mbetur për afatin e dytë do të mund ta paraqesin testin, rezultatet e të cilit do të bëhen publike më 16 tetor 2020.

Ai ka theksuar se, më pas, nga data 19-21 tetor do të jetë afati i ankesave, rezultatet e të cilave, pas shqyrtimit do të publikohen më 23 tetor, për të shënuar kështu përfundimin e gjithë procesit të Maturës Shetërore për këtë vit.

“Në afatin e parë të Maturës Shetërore, testin e kanë kaluar 17.105 nxënës nga 25.362 sa kanë marrë pjesë në test, ndërsa për 8.257 maturantë mbetet si mundësi edhe afati i dytë i Provimit të Maturës”, thuhet në raportin e MASH.

© SuharekaOnline. Të gjitha të drejtat janë të rezervuara.