Abdixhiku: Zgjidhja e vetme janë zgjedhjet!
Kryetari i Lidhjes Demokratike të Kosovës (LDK), Lumir Abdixhiku, ka deklaruar se çdo zvarritje e qëllimshme nga Lëvizja Vetëvendosje (VV) po kontribuon në zgjatjen e krizës politike në vend, ndërsa zgjidhja e vetme mbeten zgjedhjet e parakohshme.
Foto: Ilustrim
Gjatë një konference për media, Abdixhiku tha se edhe mandatari i dytë, Glauk Konjufca, duhet të jetë i sinqertë dhe të pranojë se nuk disponon shumicën parlamentare.
“Zgjidhja e vetme janë zgjedhjet”, theksoi ai para gazetarëve.
Abdixhiku po ashtu bëri të ditur se në takimin me Presidenten e Kosovës ka shprehur gatishmërinë për të diskutuar një mundësi të përkohshme për zgjatjen e buxhetit, vetëm nëse ekziston dakordimi i partive për të shkuar drejt zgjedhjeve.
Kreu i LDK-së shtoi se situata do të ishte shumë më e qartë nëse më herët do të ishte formuar një qeveri uniteti, duke parandaluar kështu ngecjet politike që po ndikojnë në vend.
Ky reagim i Abdixhikut vjen në një moment kur klima politike në Kosovë po përshkallëzohet, dhe partitë po përballen me presion për të gjetur zgjidhje për krizën dhe për funksionimin normal të institucioneve.
