Komuna e Suharekës shpall tender për ndërtimin e rrugës Suharekë–Peqan–Peqan i Vogël, investim prej 940 mijë euro
Komuna e Suharekës ka shpallur zyrtarisht një thirrje për tender në vlerë të parashikuar prej 940,000.00 euro, për projektin e ndërtimit të rrugës Suharekë–Peqan–Peqan i Vogël, një projekt ky me bashkëfinancim dhe me rëndësi të veçantë për përmirësimin e infrastrukturës lokale dhe lehtësimin e qarkullimit ndërkomunal.
Foto: Ilustrim
Afati për dorëzimin e ofertave është deri më 25 korrik 2025, ora 14:00, përmes platformës elektronike të prokurimit publik. Hapja publike e ofertave do të bëhet po atë ditë, në ambientet e Zyrës së Prokurimit të Komunës së Suharekës.
- Titulli: Projekt me bashkëfinancim – Ndërtimi i rrugës Suharekë–Peqan–Peqan i Vogël
- Afati për përfundimin e projektit: 24 muaj
- Lloji i procedurës: E hapur
- Vlera e sigurimit të tenderit: 15,000.00 euro, me vlefshmëri prej 120 ditësh
- Siguria e ekzekutimit: 10% e vlerës së kontratës, për një periudhë prej 25 muajsh
Sipas dokumentacionit teknik të tenderit, projekti përfshin:
- Punë përgatitore dhe mobilizim në terren
- Gërmim dhe nivelim të trasesë së re rrugore
- Demolim të shtresës ekzistuese të asfaltit
- Ndërtimin e shtresave të reja rrugore (tampon, asfaltim, kanalizime të ujërave atmosferikë, etj.)
- Rregullimin e skajeve rrugore, vendosjen e sinjalistikës dhe masave të sigurisë
Gjithashtu gjatë procesit sipas dokumentit të paramasës, sasia totale e kubëzave që do të demolohen është 8,331 m² dhe do të shkarkohen në deponinë legale ose në vendin të cilin e cakton organi mbikqyrës.
Tenderët do të vlerësohen sipas parimit të ofertës ekonomikisht më të favorshme, duke u bazuar në peshën e kritereve të përcaktuara në dokumentacionin e tenderit. Operatorët ekonomikë duhet të plotësojnë kërkesa strikte ligjore, profesionale, teknike dhe financiare, përfshirë përvojë të dëshmuar në projekte të ngjashme me vlerë mbi 1.4 milionë euro dhe posedimin e ISO standardeve relevante.
