Prizren, gjykata dënon Sh.A. me 20 vjet burg për vrasje të rëndë
Gjykata Themelore e Prizrenit ka dënuar me 20 vjet burgim Shefki Asllanin, për veprën penale të vrasjes së rëndë.
Ngjarja ka ndodhur më 17 prill 2021, rreth orës 12:40, në tregun e gjelbër në rrugën “Adem Voca” në Mitrovicë.
Sipas aktakuzës dhe njoftimit të gjykatës, pas një fjalosjeje verbale për rritjen e fidanit të fikut, mes të pandehurit dhe viktimës Valmir Fazliu ndodhi një konflikt fizik. Viktima fillimisht e goditi të pandehurin me gërshërë në kokë, duke i shkaktuar plagë shqyese. Në përgjigje, Asllani nxori nga brezi një revole të markës “XDM” dhe qëlloi viktimën në pjesën e përparme të trupit, duke shkaktuar plagë fatale.
Si pasojë e të shtënave, predha shkaktoi dëmtime të rënda në mushkëri dhe gjakderdhje masive, që rezultuan në vdekjen e Fazliut. Të shtënat plagosën gjithashtu dy persona të tjerë: L.F., i cili mori një plagë në regjionin e veshkës së majtë, dhe kalimtarin A.A., i cili u plagos lehtë në kofshën e majtë.
Gjykata ka cilësuar veprën penale si “Vrasje e rëndë” sipas nenit 173, paragrafi 1, pika 1.5 të Kodit Penal të Republikës së Kosovës (KPRK). Pas shpalljes së aktgjykimit, kryetarja e trupit gjykues ka njoftuar se aktgjykimi i plotë dhe i arsyetuar do t’u dorëzohet palëve brenda afatit ligjor.