Zjarre të fuqishme në Gjermaninë Lindore: Dy zjarrfikës të plagosur, fshatra të tërë evakuohen

Të paktën dy zjarrfikës janë plagosur rëndë, ndërsa përpjekjet për të vënë flakët nën kontroll vijojnë ende.

Rreth 500 zjarrfikës janë angazhuar në operacionin e shuarjes së flakëve, të cilat shpërthyen ditën e martë dhe që deri të enjten nuk ishin vendosur ende nën kontroll. Një zjarrfikëse femër dhe një mashkull pësuan djegie gjatë ndërhyrjes, ndërkohë që situata paraqitet e vështirë për shkak të terrenit të rrezikshëm.

Një pjesë e madhe e zjarreve ndodhet në një ish-zonë stërvitjeje ushtarake, ku ekziston rreziku real i shpërthimit të municioneve të mbetura. Ky fakt ka vështirësuar qasjen e zjarrfikësve dhe e ka bërë situatën akoma më të rrezikshme.

Më shumë se 100 banorë janë evakuuar nga fshatrat Heidehäuser, Neudorf dhe pjesë të Lichtensee. Autoritetet kanë dërguar njoftime emergjente në celularët e qytetarëve, duke i udhëzuar ata të marrin vetëm sendet më të domosdoshme, si dokumentet personale dhe paratë e gatshme. U kërkua gjithashtu që të informojnë fqinjët dhe të mbrojnë rrugët e frymëmarrjes me mjete të improvizuara.

Për monitorimin e situatës po përdoret edhe një helikopter i policisë shtetërore, i pajisur me kamera speciale për të zbuluar xhepat e prushit që mund të rindezin zjarret.

Ndërkohë, zyrtarët lokalë kanë bërë thirrje që drejtuesit e mjeteve të shmangin zonën për shkak të ndërhyrjeve emergjente në terren.

Zjarret janë përkeqësuar edhe nga valët ekstreme të të nxehtit që kanë goditur pjesën më të madhe të Evropës. Një anticiklon afrikan ka shkaktuar temperatura rekord, deri në 46°C, duke favorizuar shpërthimin e vatrave të zjarrit në disa vende të kontinentit.