“Duel nderi” në mes të Gjermanisë, shqiptari gjykohet për vrasjen e bashkëatdhetarit në mes të ditës

Shqiptari Kelmend M., 41 vjeç, është duke u gjykuar për vrasje me gjakftohtësi të një rivali në mes të ditës, në një rrugë të qetë të qytetit Rüsselsheim.

I pandehuri, me një anorak blu dhe flokë të shkurtër, hyri në sallën e gjyqit i heshtur, por historia që po zbulohet në këtë proces është gjithçka përveçse e heshtur. Motivi i krimit është aq i dukshëm sa i pashmangshëm për këdo që e dëgjon: Kelmend M. i mungon llapa e veshit të djathtë – një detaj që ka rrënjë të thella në një konflikt brutal.

Sipas prokurorisë, gjithçka nisi si një luftë për pushtet në skenën lokale të drogës, një përplasje për territor, ndikim dhe hakmarrje. Viktima, Arben G. (45), i njohur me nofkën “Benni”, thuhet se i kishte prerë llapën e veshit Kelmendit si një formë poshtërimi ekstrem. Një akt që, sipas prokurores Elena Beyer, është parë nga i pandehuri si një “shkelje e thellë e nderit”.

Ngjarja ndodhi më 22 prill 2024 para Café Stoa në Waldstraße të Rüsselsheim. Në orën 8:52 të mëngjesit, kamerat e sigurisë kapën momentin kur viktima po dilte nga lokali, ndjekur nga një burrë i maskuar, me doreza gome, një çantë të thjeshtë Lidl dhe një armë në dorë. Brenda pak sekondash, gjithçka përfundoi me të shtëna. Viktima u përpoq të ikte, por u rrëzua në oborrin e një ndërtese fqinje.

Në gjykatë, Kelmend M. e pranoi që ishte ai që shtiu: “Unë jam ai që gjuan”, deklaroi ai, duke shtuar se nuk kishte për qëllim vrasjen. Por dëshmitë dhe mënyra e ekzekutimit sugjerojnë të kundërtën – një atentat i paramenduar dhe i përgatitur me kujdes.

Sipas prokurores Beyer, sfondi kulturor ka luajtur një rol të rëndësishëm në këtë akt brutal. Në Shqipëri, sipas saj, prerja e llapës së veshit shihet si një ndëshkim për tradhti apo mosbindje, një gjest që lë gjurmë përjetë në trup dhe në nderin e dikujt.

Pas vrasjes, autori është kthyer në banesën e tij, ka hedhur dorezat dhe më pas dyshohet se ka hedhur armën në lumin Main. Ai iku nga Gjermania. Vrasësi u arrestua disa javë më vonë në Suedi. Tani ai përballet me burgim të përjetshëm. Procesi vazhdon.