17-vjeçari nga Kosova që plagosi mësuesen në Gjermani, jashtë rrezikut për jetën
Tre ditë pas sulmit me thikë në një kolegj profesional në Essen, atmosfera në shkollë vazhdon të jetë e rënduar.
Policia e Bochum ka konfirmuar të hënën (8 shtator) se 17-vjeçari nga Kosova, i dyshuar si autor i sulmit, nuk është më në rrezik për jetën.
Ngjarja ndodhi të premten, më 5 shtator, kur i riu plagosi rëndë një mësuese brenda shkollës. Pas sulmit, ai tentoi të arratisej, por u qëllua nga policia në një zonë të gjelbër në qendër të Essenit. Për të siguruar paanshmëri në hetime, rasti i përdorimit të armës nga policia po trajtohet nga departamenti i Bochum-it.
Atmosferë e rënduar në kolegj
Të hënën në mëngjes, procesi mësimor nuk nisi si zakonisht. Stafi pedagogjik u mblodh së bashku me drejtorin e arsimit të qytetit, Mukhtar Al Ghusain, dhe ekspertë të këshillimit psikologjik për të diskutuar situatën dhe për të mbështetur nxënësit. Vetëm pas orës 8:30, mësimet rifilluan me një ritëm të kufizuar.
Sipas informacioneve jozyrtare, 17-vjeçari kosovar kishte vetëm dy javë që ndiqte këtë shkollë profesionale me synimin për të përfunduar diplomën e shkollës së mesme. Prokuroria nuk ka konfirmuar këto të dhëna dhe as nuk ka dhënë ndonjë informacion për motivet e mundshme të sulmit.
Gjendja e mësueses
Mësuesja e plagosur iu nënshtrua një ndërhyrjeje urgjente në Spitalin Universitar të Essenit. Autoritetet kanë bërë të ditur se edhe pse lëndimet ishin serioze, jeta e saj tashmë është jashtë rrezikut.
Ky rast ka shkaktuar tronditje të madhe në qytetin gjerman dhe ka hapur diskutime të reja për sigurinë në shkolla.
