Presidenti Trump apel për paqe në Gaza: “Kthejini pengjet, bëni marrëveshje”

“Bëni marrëveshje në Gazë. Kthejini pengjet mbrapsht”, ka shkruar Trump në platformën e tij Truth Social, teksa tensionet në rajon vijojnë të jenë të larta. Postimi i tij erdhi në një moment kur po qarkullojnë shenja për një lëvizje të mundshme drejt armëpushimit.

Sipas agjencisë Associated Press, një këshilltar i lartë i kryeministrit izraelit, Benjamin Netanyahu, do të udhëtojë këtë javë drejt Uashingtonit për të diskutuar mbi një marrëveshje të mundshme paqeje. Po ashtu, janë në plan edhe përgatitjet për një vizitë të vetë Netanyahut në SHBA.

Megjithatë, procesi negociator mbetet i vështirë. Hamasi ka akuzuar Netanyahun për zvarritje dhe ka theksuar se është i gatshëm të lirojë pengjet në këmbim të një tërheqjeje të plotë të trupave izraelite dhe përfundimit të luftës. Ndërkohë, qeveria izraelite e ka etiketuar Hamasin si “pengesën kryesore” për arritjen e një marrëveshjeje.

Në një tjetër reagim të bërë të shtunën mbrëma, presidenti Trump ka kritikuar edhe procesin gjyqësor ndaj Netanyahut, duke e quajtur atë një “gjueti shtrigash” që, sipas tij, po ndërhyn në çështje të rëndësishme diplomatike.

“Netanyahu po negocion për lirimin e pengjeve, por është i bllokuar në gjykatë gjithë ditën. Kjo parodi e ‘drejtësisë’ po ndërhyn në negociata si me Iranin ashtu edhe me Hamasin”, ka shkruar Trump, duke e krahasuar situatën me sfidat ligjore që ai vetë ka përjetuar më parë.

Ndërkohë, gjykata izraelite ka anuluar dy ditë të dëshmisë së planifikuar të Netanyahut për këtë javë, pas kërkesës së tij, për shkak të zhvillimeve aktuale të sigurisë dhe negociatave diplomatike.

Situata mbetet e tensionuar, ndërsa bota po vëzhgon nga afër përpjekjet për të arritur një marrëveshje që do t’i jepte fund konfliktit të përgjakshëm.