PDK kërkon procedimin e Projektligjit për Dhomat e Specializuara: Mbrojtja e UÇK-së duhet të jetë prioritet
Partia Demokratike e Kosovës (PDK) ka kërkuar nga Qeveria që ta procedojë në Kuvend Projektligjin për ndryshimin e Ligjit për Dhomat e Specializuara, duke e cilësuar këtë çështje si prioritet.
Foto: Ilustrim
Deputetja e PDK-së, Blerta Deliu Kodra, tha se Grupi Parlamentar i PDK-së e ka ngritur këtë kërkesë edhe në mbledhjet e komisioneve parlamentare.
Ajo kritikoi Qeverinë për vonesën në procedimin e projektligjit, ndërsa theksoi se Kuvendi e ka shprehur më herët vullnetin përmes votës së 99 deputetëve për mbrojtjen e UÇK-së dhe ish-pjesëtarëve të saj.
“Për PDK-në Projektligji për ndryshimin e Ligjit për Dhomat e Specializuara në funksion të mbrojtjes së UÇK-së duhet të jetë prioritet mbi prioritete”, tha Deliu Kodra.
Sipas saj, ndërkohë që në Kuvend po procedohen projektligje të tjera me procedurë të përshpejtuar, Projektligji për Dhomat e Specializuara vazhdon të mos jetë proceduar.
Deliu Kodra tha se arsyetimi për kërkimin e ekspertizës nuk është i mjaftueshëm për PDK-në dhe kërkoi që vullneti i shprehur nga Kuvendi të përkthehet në veprim konkret.
PDK i ka bërë thirrje kryeministrit Albin Kurti dhe ministres së Drejtësisë që ta procedojnë sa më shpejt Projektligjin për ndryshimin e Ligjit për Dhomat e Specializuara në Kuvend.
