Hoxhaj pas zgjedhjeve: PDK duhet të reflektojë dhe të përballet me qeverinë

Në një video-mesazh të publikuar në profilin e tij zyrtar në Facebook, Hoxhaj falënderoi secilin votues, duke vënë në pah peshën dhe përgjegjësinë që sjell ky besim i madh.

“Afërsisht 40 mijë qytetarë më besuan votën, duke më zgjedhur për herë të nëntë deputet në Kuvend. Për këtë jam thellësisht mirënjohës,” u shpreh ai.

Hoxhaj nënvizoi se mbështetja e qytetarëve do ta udhëheqë në çdo veprim dhe vendim të tij politik, duke garantuar përkushtim në shërbim të interesit publik dhe shtetëror.

“Secilin prej jush e mbaj parasysh në çdo vendim dhe përgjegjësi që do të marr. Do të angazhohem me ndershmëri për të mbrojtur interesat tuaja dhe interesin e Republikës së Kosovës,” deklaroi ai.

Ai paralajmëroi për sfidat serioze me të cilat po përballet vendi, duke theksuar se demokracia në Kosovë po rrezikohet nga brenda, ndërsa shteti përballet me kërcënime nga jashtë, çka sipas tij kërkon veprime të qarta dhe të vendosura.

“Demokracia jonë po sfidohet nga brenda, ndërsa Kosova po përballet me rreziqe nga jashtë. Kjo situatë kërkon përballje të drejtpërdrejtë, pa kompromise,” theksoi Hoxhaj.

Duke folur për rezultatin e zgjedhjeve të 28 dhjetorit, ai tha se ky rezultat e obligon PDK-në që të jetë e fortë përballë qeverisë së ardhshme, por njëkohësisht të reflektojë dhe të reformohet si subjekt politik.

“Rezultati i 28 dhjetorit na detyron të përballemi me qeverinë e ardhshme, por edhe me vetveten. PDK-ja duhet të rigjejë veten dhe të ringrihet,” tha ai.

Në përmbyllje, Hoxhaj bëri thirrje për unitet dhe bashkim, duke theksuar se qytetari duhet të jetë në qendër të çdo angazhimi politik.