Shkodra: Kurti e avancoi Hysen Durmishin nga numri 60 në 24 për shkak të performancës
Analistët politikë në emisionin e Televizionit Tëvë1 kanë analizuar listat zgjedhore të partive politike për zgjedhjet e parakohshme të 28 dhjetorit, duke u fokusuar në renditjen e kandidatëve, përfshirjen e emrave të rinj dhe balancat e brendshme partiake.
Një nga komentet kryesore erdhi nga analisti politik Selami Shkodra, i cili foli për listën e Lëvizjes Vetëvendosje, duke vlerësuar ndryshimet e bëra nga kryetari i partisë, Albin Kurti. Sipas tij, pozicionimet e reja janë një reflektim i drejtpërdrejtë i performancës së kandidatëve gjatë mandatit të kaluar.
Shkodra theksoi se lëvizja e Hysen Durmishit, nga numri 60 në zgjedhjet e kaluara në numrin 24 në listën e re zgjedhore, është tregues i qartë i vlerësimit të lartë që Kurti dhe partia i kanë bërë punës së tij. Durmishi, i cili aktualisht mban pozitën e ministrit në detyrë të Infrastrukturës, sipas Shkodrës, ka pasur rol kyç në realizimin e projekteve infrastrukturore, veçanërisht në segmentet rrugore me prioritet kombëtar.
“Ngjitja e Durmishit në listë pasqyron rezultatet e tij konkrete në terren. Ai ka qenë një nga figurat më aktive të qeverisë dhe pritet të marrë mbështetje të fuqishme nga elektorati,” u shpreh Shkodra.
Analisti shtoi se me këtë ritëm të përkrahjes politike dhe publike, Durmishi mund të pozicionohet si një nga kandidatët më të votuar të Vetëvendosjes në këto zgjedhje.
Diskutimet në panel shënuan fillimin e analizave më të thelluara të listave zgjedhore, të cilat pritet të jenë në fokus të debatit publik deri më 28 dhjetor, kur qytetarët do të vendosin përbërjen e re të Kuvendit të Kosovës.