Besnik Bislimi e uron Peter Sorensen për detyrën e re si ndërmjetës në dialogun Kosovë-Serbi
Kreu i ekipit negociator të Kosovës, Besnik Bislimi, ka shprehur urime për diplomatin danez, Peter Sorensen, i cili është emëruar si emisar i BE-së për ndërmjetësimin e dialogut Kosovë-Serbi.
Në një postim në platformën X, Bislimi ka theksuar rëndësinë e një qasje të balancuar ndaj të dy palëve në këtë proces. Sipas tij, një qasje e tillë është parakushti kryesor për suksesin e negociatave dhe normalizimin e plotë të marrëdhënieve mes Kosovës dhe Serbisë.
“Urime Peter Sorensen për emërimin si Përfaqësues i Lartë i ri i BE-së për procesin e dialogut. I urojmë atij një mandat të suksesshëm si lehtësues, me një qasje të balancuar ndaj palëve dhe negociata si parakusht kyç për një proces të suksesshëm drejt normalizimit të plotë të marrëdhënieve”, ka shkruar Bislimi në llogarinë e tij zyrtare.
Emërimi i Sorensenit në këtë pozitë vjen në një kohë kur dialogu Kosovë-Serbi është në një pikë kyçe. Prishtina dhe Beogradi kanë pasur tensione të mëdha në muajt e fundit, duke bërë që procesi i normalizimit të ngecë.
Besnik Bislimi, në rolin e tij si kryenegociator i Kosovës, ka theksuar vazhdimisht rëndësinë e gjetjes së një zgjidhjeje kompromisore që të jetë e pranueshme për të dyja palët dhe që të kontribuojë në stabilitetin e rajonit.