Tesla dorëzon makinën e parë plotësisht autonome – Model Y udhëton vetë nga fabrika në shtëpinë e klientit

Një Model Y përshkoi vetë rrugën nga fabrika e kompanisë në Teksas deri në shtëpinë e një klienti, pa asnjë ndërhyrje njerëzore – as shofer, as operator në distancë.

Lajmin e bëri të ditur CEO i Tesla-s, Elon Musk, në një postim në platformën X, ku theksoi se automjeti lundroi me sukses nëpër parkingje, autostrada dhe rrugë qyteti për të arritur në destinacionin e tij, dhe madje e përfundoi udhëtimin një ditë përpara afatit.

Sipas raportimit të Bloomberg, kreu i Inteligjencës Artificiale dhe Autopilotit në Tesla, Ashok Elluswamy, bëri të ditur se makina arriti një shpejtësi maksimale prej 72 miljesh në orë gjatë këtij udhëtimi 30-minutësh.

Ky zhvillim vjen vetëm disa ditë pasi kompania filloi testimin e kufizuar të shërbimit të saj robotaxi në qytetin Austin të Teksasit. Aktualisht, një flotë e vogël prej rreth 10 deri në 20 automjetesh po operon në një zonë të përcaktuar me gjeo-gardh, duke ofruar udhëtime për përdorues të përzgjedhur. Çdo udhëtim kushton një tarifë fikse prej 4.20 dollarësh. Testet kanë nisur të dielën dhe po monitorohen nga afër si pjesë e fazës fillestare të vlerësimit të sistemit.

Megjithëse inovacioni shënon një hap të madh përpara, Tesla paralajmëron se shërbimi mund të pezullohet përkohësisht në kushte të pafavorshme atmosferike. Me këtë iniciativë, kompania përballet në mënyrë të drejtpërdrejtë me Waymo, në pronësi të gjigantit Alphabet, i cili tashmë ofron shërbime robotaxi në disa qytete amerikane.