Goditje e rëndë për botën e kriptomonedhave: Hakerët vjedhin 1.5 miliardë Euro nga Bybit

Ky incident, i cili mund të jetë vjedhja më e madhe e kriptomonedhës e regjistruar ndonjëherë, ka ngritur shqetësime serioze mbi sigurinë e aseteve dixhitale.

Sipas informacioneve të bëra publike, sulmuesit kanë arritur të marrin kontrollin e një portofoli Ethereum të Bybit, duke transferuar zotërimet e tij në një adresë të panjohur. Bybit, një shkëmbim me bazë në Dubai dhe me mbi 60 milionë përdorues në mbarë botën, ka konfirmuar incidentin, duke siguruar se asnjë portofol tjetër nuk është prekur dhe se tërheqjet e aseteve po vazhdojnë normalisht.

Megjithatë, paniku i krijuar pas sulmit ka bërë që Bybit të përballet me një fluks të jashtëzakonshëm të kërkesave për tërheqje. Shefi ekzekutiv i kompanisë, Ben Zhou, e ka cilësuar këtë si “hakimin më të keq në histori”, duke njoftuar se më shumë se 350,000 kërkesa për tërheqje janë përpunuar me sukses.

Ky incident ka tejkaluar rekordin e mëparshëm të vjedhjes së kriptomonedhave, i cili mbahej nga Ronin Network në vitin 2022, me një vlerë prej 620 milionë dollarësh. Hetimet janë në vazhdim nga ekipi i sigurisë së Bybit, i cili po punon për të zbuluar detajet e sulmit dhe për të marrë masa për të parandaluar incidente të ngjashme në të ardhmen.