WhatsApp paralajmëron: Rrezik ‘malware’ në versionin për Windows, kujdes me fotot!

Sipas ekspertëve të sigurisë, ky ‘malware’ mund të përhapet nëpërmjet fotove dhe skedarëve që duken të padëmshëm. Hapja e këtyre imazheve mund të shkaktojë probleme serioze, pasi ‘malware’ mund të infektojë kompjuterët pa u vënë re. Përdoruesit këshillohen të jenë jashtëzakonisht të kujdesshëm me fotot që marrin në WhatsApp dhe t’i ndajnë ato vetëm me kontakte të besuara.

Deri më tani, WhatsApp nuk ka marrë informacione që tregojnë se kjo dobësi është shfrytëzuar për qëllime keqdashëse. Megjithatë, ekspertët theksojnë se kjo mund të ndodhë pa u vënë re, duke e bërë vigjilencën thelbësore.

Çfarë është ‘malware’?

‘Malware’ është një term i përgjithshëm që përshkruan çdo program të krijuar me qëllim dëmtues. Ai përfshin viruse, trojanë, spyware dhe adware, dhe mund të shpërndahet nëpërmjet email-eve, faqeve të internetit, skedarëve të infektuar dhe mesazheve në aplikacione si WhatsApp. ‘Malware’ mund të infektojë kompjuterin tuaj, të vjedhë të dhëna personale, të dëmtojë skedarë dhe të marrë kontrollin e sistemeve të ndryshme.