Mesfushori shqiptar, në rrugë drejt Interit

Mesfushori i Leçes, Ylber Ramadani, konfirmoi se ai ka zhvilluar bisedime me drejtorin e Interit, Piero Ausilio.

27-vjeçari mbërriti në skuadrën italiane këtë verë nga Aberdeen, në një marrëveshje me vlerë vetëm 1.2 milionë euro. Ai nënshkroi një kontratë trevjeçare me një opsion për të katërtin.

Ramadani ka lënë përshtypje në muajt e parë të aventurës së tij në Itali, duke luajtur mbi 1100 minuta në 13 ndeshje në Serie A dhe Coppa Italia. Deri më tani, ai ka dëshmuar aftësitë e tij si një mesfushor i fortë mbrojtës, shkruan Kosovapress.

“Ai ishte në Tiranë, takova Ausilion dhe qëndruam gjatë duke biseduar. Për mua është një motiv shumë i madh, nuk mund të ndaloj së punuari për të shkuar te Interi”, tha Ramadani.

Mesfushori shqiptar foli më pas për idenë për të luajtur me bashkatdhetarin e tij, Kristjan Asllani.

“Unë përshtatem shumë shpejt. Asllani është më teknik se unë, por unë bëj gjëra të tjera. Mund të luaj me një ose dy mesfushorë qendrorë, nuk ka problem”, theksoi ai.

Interi është në kërkim të Scudetto-s këtë sezon dhe mund të kërkojë të forcojë mesfushën e tyre në afatin kalimtar të janarit me një opsion me kosto të ulët.