Zbulohet skema e mashtrimit, dy sllovenë regjistruan 172 të huaj në adresa false

08.08.2025

Një skemë mashtrimi e sofistikuar që ka operuar për më shumë se dy vjet është zbuluar nga autoritetet sllovene.

Dy shtetas sllovenë akuzohen se kanë mashtruar disa njësi administrative të policisë në Maribor dhe Celje duke regjistruar 172 shtetas të huaj në adresa të rreme, ku ata nuk kishin jetuar kurrë, shkruan urgjent.com.

Sipas Departamentit të Policisë së Mariborit, dy të dyshuarit, përmes falsifikimit të dokumenteve dhe deklaratave, kanë arritur të regjistrojnë banim të përkohshëm ose të përhershëm për persona nga vende të treta, duke përdorur nënshkrime të falsifikuara të pronarëve të banesave.

Aktiviteti kriminal ka nisur në qershor të vitit 2022 dhe ka zgjatur deri në gusht të vitit 2024. Gjatë kësaj periudhe, dy të akuzuarit kanë manipuluar punonjësit e njësive administrative, duke siguruar miratimin e deklaratave false të banimit. Kjo skemë ka prekur një numër të madh njerëzish, 172 në total, të cilët nuk kanë pasur asnjë lidhje fizike me adresat ku u regjistruan.

Njëri prej të dyshuarve akuzohet gjithashtu për një rast të veçantë mashtrimi. Në tetor 2023, ai mashtroi një shtetas të huaj duke i premtuar se do t’i rregullonte dokumentet e banimit në Slloveni. I huaji i dha atij 500 euro, por regjistrimi nuk u krye kurrë.

Për shkak të këtyre veprimeve, Departamenti i Policisë Kriminale i Mariborit ka ngritur kallëzim penal kundër dy personave në Prokurorinë e Shtetit, ku akuzat përfshijnë falsifikim dokumentesh dhe mashtrim.