Slloveni, 229 shkolla fillore dhe të mesme kanë marrë email për kërcënim me bombë, evakuohen nxënësit

Gjatë natës, qindra institucione arsimore në të gjithë vendin, përfshirë edhe kryeqytetin Ljubljana, kanë marrë një email identik që paralajmëronte për një bombë të vendosur në ndërtesë. Sipas policisë, mesazhi është dërguar nga një adresë e falsifikuar dhe nuk përmbante detaje konkrete për vendndodhjen e bombës apo kohën e shpërthimit.

Policia: Bëhet fjalë për një mashtrim masiv

Hetimet paraprake të policisë kanë zbuluar se kërcënimet janë dërguar në mënyrë automatike nga një vend i tretë dhe se janë marrë edhe nga shtete të tjera evropiane.

“Bëhet fjalë për një mashtrim tipik, ku një person ose një grup personash përpiqen të shkaktojnë panik dhe të destabilizojnë situatën”, ka deklaruar Primož Ogrinc, shefi i departamentit për terrorizëm dhe dhunë ekstreme.

Pavarësisht sigurive të policisë, disa shkolla dhe kopshte kanë vendosur të evakuojnë nxënësit si masë paraprake. Në qytete si Ptuj, Ormozh, Slovenska Bistrica dhe Sevnica, fëmijët janë transferuar në vende të sigurta derisa policia të kryejë kontrollet e nevojshme.

“Ne e marrim këtë çështje shumë seriozisht dhe po bëjmë gjithçka që është e mundur për të garantuar sigurinë e nxënësve dhe të stafit”, ka deklaruar një zyrtar i arsimit.