Cigaret elektronike dhe produktet tjera të duhanit do të kenë etiketa parandaluese në paketimet e tyre
Në mbledhjen e 238-të të Qeverisë së Kosovës, u miratua Projektligji për Prodhimin, Kultivimin, Grumbullimin, Përpunimin, Tregtimin dhe Kontrollin e Duhanit dhe Produkteve të Ndërlidhura.
Ky ligj ka për qëllim harmonizimin e legjislacionit të Kosovës me standardet e Bashkimit Evropian dhe përmbushjen e masave të programuara për integrimin evropian.
Ministri i Shëndetësisë, Arben Vitia, shpjegoi rëndësinë e këtij projektligji, duke nënvizuar se ai rregullon aspekte të rëndësishme të sektorit të duhanit:
“Me këtë projektligj përcaktohen masat për reduktimin dhe kufizimin e përdorimit të duhanit, produkteve të tij dhe produkteve të tjera të ndërlidhura, duke përfshirë etiketat e detyrueshme në paketimet e tyre dhe masat parandaluese kundër pirjes së duhanit.”
Ky projektligj, i cili është i harmonizuar me direktivën e BE-së 2014/40/BE, përfshin dispozita të rëndësishme për kontrollin dhe rregullimin e produkteve të reja si cigaret elektronike, të cilat deri më tani nuk ishin të përfshira në legjislacionin ekzistues.
Ndryshimet kryesore që priten nga ky projektligj përfshijnë:
- Rregullimin dhe kufizimin e prodhimit dhe tregtimit të duhanit dhe produkteve të tij.
- Vendosjen e etiketave të qarta paralajmëruese në paketimet e produkteve të reja të duhanit.
- Masa parandaluese për të ulur konsumin e duhanit në nivel kombëtar.
- Harmonizimin e legjislacionit vendas me standardet evropiane.
