Trump zyrtarizon “Super Inteligjencën”: Qeveria amerikane do të zëvendësojë termin AI me SI

Urdhri, i titulluar “Inaugurating the Era of Super Intelligence”, udhëzon departamentet dhe agjencitë federale që, në masën e lejuar nga ligji, të përdorin termat “Super Intelligence” dhe “SI” në korrespondencën zyrtare, komunikimet publike, faqet e internetit, raportet, dokumentet e politikave dhe materiale të tjera jostatutore.

Në arsyetimin e urdhrit thuhet se sistemet moderne të teknologjisë kanë avancuar përtej asaj që nënkuptohej kur u përdor për herë të parë termi “Inteligjencë Artificiale”, rreth shtatë dekada më parë. Sipas administratës amerikane, aftësitë e sistemeve më të avancuara po shkojnë përtej imitimit apo automatizimit të aspekteve të veçanta të inteligjencës njerëzore.

Urdhri nuk e ndryshon menjëherë teknologjinë apo përkufizimin ligjor të inteligjencës artificiale. Për qëllimet e zbatimit të tij, “Super Intelligence” dhe “SI” do të përfshijnë teknologjitë dhe sistemet që aktualisht përfshihen në përkufizimin ligjor federal të “Artificial Intelligence”.

Gjithashtu, dokumenti sqaron se nuk kërkohet ndryshimi i rregulloreve të miratuara më herët, kontratave, granteve apo dokumenteve historike. Ndërkohë, brenda 60 ditësh, këshilltari i Presidentit për Shkencë dhe Teknologji duhet të propozojë një përkufizim federal për “Super Intelligence” dhe ndryshimet e mundshme ligjore që lidhen me të.

Ndryshimi, pra, është kryesisht një ndryshim zyrtar i terminologjisë së administratës amerikane. Termi “AI” vazhdon të përdoret gjerësisht në komunitetin shkencor dhe teknologjik, ndërsa urdhri i Trump synon që administrata federale amerikane të përdorë “SI” në dokumentet dhe komunikimet e saj zyrtare.