Sot në ora 12:00 hidhet shorti për kualifikimet e Botërorit FIFA 2026

Në kualifikueset europiane do të marrin pjesë gjithsej 54 kombëtare, të cilat do të garojnë për 16 vendet që çojnë drejt Kupës së Botës. Ky numër i rritur nga 13 në 16 ekipe pas zgjerimit të formatit të turneut, rrit konkurrencën dhe shanset për shumë kombëtare të cilat synojnë të bëjnë histori.

Kombëtaret pjesëmarrëse do të ndahen në 12 grupe me nga katër ose pesë skuadra. Gjatë periudhës mars-nëntor 2025, ekipet do të zhvillojnë ndeshje në shtëpi dhe jashtë me kundërshtarët e grupit të tyre. Fituesit e grupeve do të sigurojnë automatikisht një vend në Kupën e Botës, ndërsa ekipet e dyta do të kalojnë në raunde të tjera kualifikimesh për të përcaktuar pjesëmarrësit përfundimtarë.

Në vazon e parë janë përfshirë disa nga ekipet më të forta të kontinentit, përfshirë Austrinë, Belgjikën, Kroacinë, Danimarkën, Anglinë, Francën, Gjermaninë, Italinë, Holandën, Portugalinë, Spanjën dhe Zvicrën. Këto ekipe priten të jenë favoritë për të siguruar një vend në turneun e madh.

Procedurat dhe parametrat për shortin janë konfirmuar së fundmi dhe një shpjegim i detajuar është i disponueshëm në dokumentet zyrtare të UEFA-s dhe FIFA-s.

Ngjarja mund të ndiqet drejtpërdrejt në FIFA.com dhe platformën FIFA+, duke ofruar mbulim të plotë dhe analizë për të gjitha fazat e shortit.