25 vrasje për 4 muaj në Kosovë, për një vit u kapën mbi 1 mijë armë nga duart e qytetarëve

Një gjë të tillë e kanë bërë të ditur nga Zyra e Informimit të Policisë për KlanKosovën.

Gjatë muajit janar të këtij viti u raportuan shtatë raste të vrasje, po ashtu edhe në shkurt e mars u raportuan shtatë raste të vrasje, derisa në muajin prill ndodhën katër vrasje.

Duke u bazuar në këto statistika të Policisë së Kosovës, shihet një aktivitet i shtuar nga policia drejt parandalimit të rasteve të tilla.

Sipas statistikave, për pesë vite janë konfiskuar 6 mijë e 538 armë ilegale të llojeve të ndryshme gjatë operacioneve policore.

Ndërsa vetëm gjatë vitit 2021, u konfiskuan 1 mijë e 280 armë të cilët qytetarët i mbajtën në duart e tyre pa poseduar leje.

Gjithashtu, nga Policia e Kosovës kanë bërë të ditur se kanë konfiskuar edhe një numër të madh të municionit.

Gjatë vitit të kaluar organet e rendit kanë konfiskuar mbi 42 mijë copë municion të kalibrave të ndryshëm. ndërkaq në total nga viti 2017-të e deri në vitin 2021 i kanë konfiskuar 153 mijë e 335 copë të kalibrave të ndryshëm të municionit.