Takime zyrtare dhe me diasporën, Osmani në vizitë dyditore në Zvicër
Presidentja e Kosovës, Vjosa Osmani, ka filluar një vizitë shtetërore dyditore në Zvicër, ku është pritur nga presidentja e Konfederatës Zvicerane, Karin Keller-Sutter, në Lohn Manor, rezidenca zyrtare e Këshillit Federal të Zvicrës.
Foto: Ilustrim
Pas takimit bilateral, Presidentja Osmani u prit me nderime ushtarake në Sheshin Federal në Bernë. Më pas, të dyja presidentet dhanë deklarata për media nga Ndërtesa e Parlamentit/Këshilli Federal.
Vizita vazhdoi me një konferencë të përbashkët për media të dy lidereve, ku u diskutuan marrëdhëniet dypalëshe, bashkëpunimi ndërkombëtar dhe roli i diasporës kosovare në Zvicër.
Gjatë qëndrimit në Zvicër, Presidentja Osmani do të zhvillojë gjithashtu një takim me mërgatën shqiptare në qytetin e Gjenevës.
Presidentja Osmani, e cila shoqërohet nga bashkëshorti i saj, Prindon Sadriu, ka publikuar pamje në Facebook pas mbërritjes në Bernë. Kjo vizitë shtetërore thekson rëndësinë e marrëdhënieve mes Kosovës dhe Zvicrës, si dhe vlerëson kontributin e diasporës kosovare në Zvicër.
