Mësohet vendi ku do të jetë stadiumi i ri i FC Ballkanit

Lajmet e mira për futbolldashësit nga Suhareka nuk kanë të ndalur.

Vetëm një ditë pasi siguruan pjesëmarrjen në grupe të Conference League, Kryetari i Suharekës, Bali Muharremaj kumtoi lajmin se kanë vendosur për ndërtimin e stadiumit të ri.

I pari i Komunës së Suharekës për AlbanianNews.net bëri të ditur edhe vendin e saktë se ku do të marrë jetë tempulli i kampionëve kosovar.

“Kemi vendosur një hapësirë prej 7 hektarësh, në përfundim të zonës industriale”, tha Muharremaj. Stadiumi i ri nga qyteti nuk do të jetë më larg se 3 km, derisa Muharremaj më pas shtoi se për ndërtimin e tij nuk do të lë gur pa lëvizur.

“Do të kërkojmë nga të gjithë akterët institucional përkrahje, takimet do ti nisim nga java e ardhshme, qoftë nevoja edhe ligje nëse ka nevoj me u ndryshu apo plotësu nga deputetët e Republikës”, shtoi Muharremaj.

Më pas ai tha se do të jenë në kontakt të vazhdueshëm edhe me FFK, derisa nga bizneset si çdo herë pret përkrahje.

Muharremaj është ndër kryetarët e rrallë në Kosovë, i cili i kushton rëndësi të veçantë sportit. Padyshim se përkrahja që ai i jep sportistëve por edhe bizneseve të cilat i ndihmojnë sportit e bëjnë atë ndër më të merituarit për sukseset e klubeve nga Theranda.