PDK tërhiqet nga procesi: E konsideron të përmbyllur kontributin për zgjedhjen e Presidentit
Partia Demokratike e Kosovës (PDK) ka bërë të ditur se e konsideron të përmbyllur kontributin e saj në procesin për zgjedhjen e Presidentit të ri të vendit, duke fajësuar pushtetin aktual për mungesë vullneti politik dhe seriozitet institucional.
Pas mbledhjes së Këshillit Drejtues, PDK theksoi se kishte shprehur gatishmëri të plotë për zhbllokimin e situatës përmes mbështetjes së një kandidati konsensual, pa kushte për përfshirje në qeveri.
Megjithatë, sipas kësaj partie, kjo qasje nuk u vlerësua, duke çuar në bllokim të procesit.Në deklaratën politike, PDK ngriti shqetësime edhe për gjendjen ekonomike në vend, duke kërkuar masa urgjente për përballimin e rritjes së kostos së jetesës.
Po ashtu, u kërkua një vendim i drejtë dhe i paanshëm nga Dhomat e Specializuara në Hagë për ish-krerët e UÇK-së.
Këshilli Drejtues ritheksoi gjithashtu nevojën për mbajtjen e zgjedhjeve të brendshme gjatë vitit 2026, me synim forcimin e demokracisë së brendshme dhe ndërtimin e një alternative të re qeverisëse.
