Osmani dhe Westerlund forcojnë bashkëpunimin, Suedia mbështet Zyrën e Presidentes me ekspertizë
Presidentja e Republikës së Kosovës, Vjosa Osmani, ka pritur në një takim zyrtar ambasadorin e Suedisë në Kosovë, Jonas Westerlund, ku u diskutua për zhvillimet e fundit në vend dhe për bashkëpunimin e ngushtë mes dy shteteve, veçanërisht në kontekstin e sfidave të përbashkëta në kontinentin evropian.
Kulmi i takimit ishte nënshkrimi i Memorandumit të bashkëpunimit mes Zyrës së Presidentes, Ambasadës Suedeze dhe Balkan Policy Research Group (BPRG). Ky memorandum do të sigurojë mbështetjen e shtetit suedez për Zyrën e Presidentes, duke ofruar ekspertizë profesionale në fushat e veprimtarisë së institucionit të presidencës.
Gjatë ceremonisë së nënshkrimit, Presidentja Osmani shprehu mirënjohjen e saj për mbështetjen e vazhdueshme të Suedisë ndaj Kosovës, duke theksuar rëndësinë e partneritetit në forcimin e institucioneve demokratike dhe në avancimin e agjendës evropiane të vendit.
“Ky Memorandum bashkëpunimi shënon një tjetër hap konkret në drejtim të përforcimit të kapaciteteve institucionale dhe krijimit të politikave të bazuara në ekspertizë dhe praktikat më të mira ndërkombëtare,” deklaroi Presidentja Osmani.
Ambasadori Westerlund, nga ana e tij, riafirmoi angazhimin e Suedisë për të mbështetur Kosovën në rrugën e saj drejt integrimit evropian dhe në forcimin e demokracisë. Ai theksoi se ky bashkëpunim do të ndihmojë në adresimin e sfidave të përbashkëta dhe në promovimin e vlerave evropiane.
