Në Kongresin Amerikan paraqitet rezoluta 26, që dënon dhunën seksuale gjatë luftës në Kosovë
Kongresistë amerikanë kanë paraqitur Rezolutën 26, e cila dënon krimet e dhunës seksuale të kryera gjatë luftës në Kosovë më 1998-1999 dhe ofron mbështetje të qartë për të mbijetuarit e këtyre krimeve.
Ky zhvillim përbën një hap të rëndësishëm në përpjekjet ndërkombëtare për të kërkuar drejtësi dhe njohje për viktimat, si dhe për të theksuar rëndësinë e ndërgjegjësimit global për krimet e heshtura të luftës.
Lajmi është bërë i ditur nga Qendra Kosovare për Rehabilitimin e të Mbijetuarve të Torturës (QKRMT), e cila e ka cilësuar këtë rezolutë si “një zë të fuqishëm dhe të vonuar, por të domosdoshëm”. Sipas përfaqësuesve të kësaj qendre, ky akt është një hap përpara në rrugën e gjatë dhe të dhimbshme drejt drejtësisë për të mbijetuarit.
“Një betejë e gjatë, e dhimbshme dhe e heshtur që më në fund po merr vëmendjen që meriton. Mirënjohje për Vasfije Krasniqi Goodman – simbol i guximit – dhe Vera Mjeku për përkushtimin dhe zërin e palodhur në këtë rrugëtim drejt së vërtetës. Kjo rezolutë sjell shpresë për çdo të mbijetuar që ka pritur drejtësi për vite me radhë,” thuhet në reagimin e Shyrete Tahiri dhe Ramadan Nishori nga QKRMT.
Ndërkohë që numri i saktë i personave të dhunuar gjatë luftës së fundit në Kosovë mbetet i panjohur, një raport i Qendrës Amerikane për Kontrollimin dhe Parandalimin e Sëmundjeve vlerëson se kjo shifër mund të arrijë deri në 20.000. Megjithatë, vetëm rreth 2.000 persona deri tani kanë marrë statusin ligjor si të mbijetuar të dhunës seksuale gjatë luftës.
Rezoluta 26 shënon një moment domethënës për Kosovën, por edhe për viktimat e krimeve të ngjashme në mbarë botën. Ajo nxit qeveritë dhe institucionet ndërkombëtare që të mos lejojnë më që dhuna seksuale gjatë konflikteve të mbetet në hije, por të trajtohet me seriozitetin dhe ndjeshmërinë që meriton.
