MINT cakton çmimet tavan: Nafta 1.66 euro, benzina 1.44 euro për dy ditët e ardhshme
Ministria e Industrisë, Ndërmarrësisë, Tregtisë dhe Inovacionit (MINT) ka publikuar udhëzimin e ri për çmimet maksimale të lejuara për shitjen e derivateve të naftës në territorin e Kosovës.
Foto: Ilustrim
Sipas këtij vendimi, i cili bazohet në rregulloret për rregullimin e çmimeve të naftës dhe gazit, masat e reja do të jenë të vlefshme për datat 26 dhe 27 prill 2026.
Për dy ditët në vijim, pikat e shitjes me pakicë nuk lejohen të shesin naftën (dizelin) më shtrenjtë se 1.66 euro për litër.
Ndërkohë, çmimi maksimal i lejuar për benzinën është caktuar në 1.44 euro, ndërsa gasi do të tregtohet me një tavan prej 0.86 euro për litër.
Ministria ka specifikuar se këto çmime hyjnë në fuqi zyrtarisht nga ora 10:00 e ditës së sotme.Ky vendim vjen si një masë për të stabilizuar tregun dhe për të parandaluar abuzimet e mundshme me çmime gjatë fundjavës dhe fillimit të javës së re.
Në fund të njoftimit, MINT ka inkurajuar qytetarët që të jenë vigjilentë dhe të raportojnë çdo parregullsi që hasin në pikat e karburantit.
Të gjitha ankesat mund të adresohen zyrtarisht në departamentin për mbrojtjen e konsumatorit përmes postës elektronike ose në numrin e telefonit pa pagesë, me qëllim që inspektorati të marrë masat e nevojshme ndaj shkelësve.
