Lehtësohet aplikimi për statusin e personave me aftësi të kufizuara dhe dëmtim të shikimit përmes eKosova

Ky hap është bërë i mundur pas miratimit të akteve nënligjore përkatëse, të cilat lehtësojnë ndjeshëm procesin e aplikimit dhe eliminojnë procedurat burokratike të mëparshme.

Tashmë, përmes platformës eKosova, qytetarët mund të plotësojnë kërkesën për njohjen e statusit të personave me aftësi të kufizuara apo kërkesën për njohjen e statusit të personave me dëmtim të shikimit në mënyrë më të thjeshtë dhe të shpejtë. Formularët e aplikimit janë të njëjtë si për aplikimet e para, ashtu edhe për procesin e rivlerësimit.

Për të aplikuar, qytetarët duhet të vizitojnë platformën eKosova në adresën https://ekosova.rks-gov.net/567. Aty, fillimisht duhet të klikojnë butonin “Shërbimet,” më pas të zgjedhin kategorinë “Familja” ku do të gjejnë formularët përkatës të aplikimit.

Ky zhvillim pritet të lehtësojë ndjeshëm jetën e personave me aftësi të kufizuara dhe atyre me dëmtim të shikimit, duke iu kursyer kohë dhe duke thjeshtuar procesin e marrjes së statusit të tyre.