Kosova ndalon importin e shpezëve dhe produkteve nga disa zona të Polonisë për shkak të gripit të shpendëve
Agjencia e Ushqimit dhe Veterinarisë (AUV) ka njoftuar ndalimin e menjëhershëm të importit të shpezëve të gjalla dhe produkteve të tyre nga disa regjione të Polonisë, për shkak të pranishmërisë së virusit “Avian Influenza (HPAI–H5N1)”.
Foto: Ilustrim
Sëmundja është evidentuar në ferma komerciale, familjare dhe te shpezët e egra në Lubuskie, Wielkopolskie, Kodzkie dhe Podlaskie.
Masa mbetet në fuqi deri në një vlerësim të ri të situatës dhe ka për qëllim mbrojtjen e shëndetit të kafshëve dhe sigurisë ushqimore në Kosovë.
Importi nga zonat e prekura lejohet vetëm nëse produktet kanë origjinë nga ferma të paprekura nga sëmundja, të cilat ndodhen të paktën 50 km larg zonave të infektuara.
AUV po monitoron situatën dhe do të informojë publikun dhe operatorët ekonomikë për çdo ndryshim eventual.
