Kosova merr kryesimin e Fondit për Ballkanin Perëndimor, theksi te bashkëpunimi dhe integrimi evropian
Republika e Kosovës ka marrë zyrtarisht kryesimin njëvjeçar të Fondit për Ballkanin Perëndimor (WBF), një iniciativë kyçe ndër-rajonale që synon forcimin e bashkëpunimit dhe dialogut mes vendeve të rajonit përmes organizatave të shoqërisë civile dhe projekteve të përbashkëta.
Që nga 1 janari 2025, Kosova, përmes Ministrisë së Punëve të Jashtme dhe Diasporës (MPJD), ka pasuar Bosnjë dhe Hercegovinën në udhëheqjen e Fondit. Në kuadër të këtij kryesimi, nga 11 deri më 13 qershor në Prishtinë po zhvillohet aktiviteti “Regional Networking and Dialogue Session”, organizuar nga WBF në bashkëpunim me Bashkimin Evropian. Ky sesion synon të nxisë rrjetëzimin dhe shkëmbimin e përvojave ndërmjet akterëve të shoqërisë civile në Ballkanin Perëndimor.
Në hapjen zyrtare të aktivitetit, MPJD shënoi fillimin e kryesimit të Kosovës me një pritje zyrtare për pjesëmarrësit nga vendet e rajonit. Drejtori i Departamentit për Evropë, BE dhe Rajon në MPJD, z. Mentor Tahiri, theksoi përkushtimin e Kosovës ndaj bashkëpunimit rajonal si pjesë e rrugëtimit drejt integrimit evropian.
“Për Kosovën, vlerat dhe standardet evropiane janë themel për ndërtimin e një bashkëpunimi të qëndrueshëm rajonal,” tha Tahiri. Ai shtoi se gjatë këtij mandati njëvjeçar, Kosova do të angazhohet për forcimin institucional të Fondit dhe për zgjerimin e qasjes për të gjithë aktorët relevantë.
Tahiri theksoi gjithashtu rëndësinë e pjesëmarrjes së barabartë të organizatave të shoqërisë civile në programet e WBF dhe shprehu krenarinë që mbi 100 përfitues nga Kosova kanë qenë të përfshirë në projekte të financuara nga ky fond, qoftë si udhëheqës apo si partnerë.
Aktiviteti tre-ditor në Prishtinë pritet të shërbejë si platformë për avancimin e bashkëpunimit ndërkufitar dhe për afirmimin e rolit të Kosovës në nismat rajonale që përforcojnë integrimin, stabilitetin dhe zhvillimin e qëndrueshëm të Ballkanit Perëndimor.