Kosova bëhet për herë të parë me qendër nacionale për trajnim në fushën e kërkim shpëtimit
Ministri i Punëve të Brendshme, Xhelal Sveçla, ka njoftuar sot inaugurimin e Qendrës së parë Nacionale për Trajnim në fushën e kërkim-shpëtimit në Kosovë.
Kjo qendër është pjesë e një iniciative të re brenda Agjencisë së Menaxhimit të Emergjencave (AME), e cila synon të forcojë kapacitetet e kërkim-shpëtimit në ujë dhe mal.
Gjatë ceremonisë së inaugurimit, që u zhvillua në Zubin Potok, buzë Liqenit të Ujmanit, ministri Sveçla theksoi rëndësinë e këtij hapi për përmirësimin e përgjigjes ndaj situatave emergjente. “Këtë javë, me kënaqësi kam nënshkruar vendimin përmes së cilit i kam hapur udhë funksionalizimit të komponentës së kërkim-shpëtimit brenda AME-së,” tha ai.
Investime për Modernizimin e Infrastrukturës së Emergjencave
Ministri Sveçla bëri të ditur se objekti ku do të funksionojë qendra ishte i pashfrytëzuar, por është restauruar dhe adaptuar për nevojat e trajnimimit profesional të kuadrove të AME-së. Investimi për sanimin dhe funksionalizimin e këtij objekti ka kapur vlerën prej rreth 990 mijë euro.
Pjesë e këtyre përpjekjeve për modernizimin e infrastrukturës së emergjencave është edhe ndarja e dy kamionëve të rinj për zjarrfikësit, të cilët do të përdoren për intervenime në objekte të larta dhe në distanca të mëdha. “Mëngjesin e sotëm e filluam me ndarjen e dy kamionëve për Agjencinë e Menaxhimit të Emergjencave, me të cilët zjarrfikësit tanë do të kenë mundësinë e intervenimit më efikas,” shtoi ministri.
Rritja e Kapaciteteve për Siguri dhe Përgjigje Efektive
Drejtori i Agjencisë së Menaxhimit të Emergjencave, Genc Metaj, i cili ishte i pranishëm në ceremoninë e inaugurimit, theksoi se kjo qendër do të luajë një rol kyç në trajnimin dhe profilizimin e ekipeve të kërkim-shpëtimit. Trajnimet do të fokusohen në zhvillimin e aftësive për operacione në kushte të vështira, siç janë ato në ujëra dhe në terrene malore.
Me funksionalizimin e kësaj qendre, Kosova bën një hap të rëndësishëm drejt rritjes së kapaciteteve për menaxhimin e emergjencave dhe përmirësimin e sigurisë së qytetarëve në situata krizash.

