Në takimin e tretë të Nismës për Bashkëpunim në Komunitet, që u mbajt dje në ambientet e #KCSF, u fol për angazhimin e pjesëtarëve të saj drejt identifikimit dhe komentimit të çështjeve më të rëndësishme të shëndetit mendor, duke mobilizuar qytetarë dhe organizata të shoqërisë civile në kuadër të procesit të konsultimeve publike mbi Koncept Dokumentin për Shëndet Mendor, si hap para hartimit të Ligjit për Shëndetin Mendor.

Siç thuhet në komunikatë, gjatë këtij takimi, pjesëmarrësit nga organizata të shoqërisë civile, përfaqësues të institucioneve të shëndetit mendor dhe mediave shprehën përkushtimin për të punuar së bashku.

Në takim u ritheksua nevoja për të pasur një proces pjesëmarrës dhe gjithëpërfshirës të hartimit të Projekt-Ligjit për Shëndetin Mendor.

Pjesëmarrësit theksuan se është e rëndësishme që të sigurohet që zërat dhe përvojat e të prekurve nga çrregullimet mendore të dëgjohen dhe të përfshihen në hartimin e këtij ligji. Aspekt tjetër i rëndësishëm që u trajtua është sigurimi i qëndrueshmërisë financiare të organizatave joqeveritare që ofrojnë shërbime të shëndetit mendor për qytetarët përmes përmirësimit të procedurave të kontraktimit social. Gjithashtu, pjesëmarrësit në takim e konsideruan si vital, angazhimin për rritje të ndërgjegjësimit senzitiv qytetar rreth shëndetit mendor, duke promovuar mirëkuptimin, duke luftuar stigmën dhe duke inkurajuar njerëzit të kërkojnë ndihmë.

Siå thuhet tutje, përfundimisht u pajtuan se procesi i hartimit të Ligjit për Shëndetin Mendor, shërben si motivim për angazhim të përbashkët për të sjellë një ndryshim të vërtetë dhe për të krijuar një të ardhme më të mirë për të gjithë në Kosovë.

Nisma për Bashkëpunim në Komunitet zbatohet në kuadër të Programit për Angazhim Qytetar, të zbatuar nga KCSF në partneritet me USAID-in në Kosovë./KlanKosova/