DokuFest reagon ashpër: Komuna e Prizrenit ul buxhetin, rrezikohet e ardhmja e festivalit

Përkundër rritjes së buxhetit të përgjithshëm për kulturën në komunë, fondet e ndara për DokuFest janë ulur me gati 30% krahasuar me vitin e kaluar, duke përfaqësuar më pak se 9% të buxhetit total të festivalit. Organizatorët e quajnë këtë një vendim që minon rëndësinë kulturore dhe ekonomike të festivalit dhe një goditje ndaj gjithë asaj që është ndërtuar me përkushtim për gati një çerek shekulli.

“Jo vetëm çështje buxheti, por vizioni për kulturën”

“Nuk është vetëm çështje buxheti. Është çështje vizioni dhe përkushtimi ndaj kulturës, qytetarëve dhe imazhit të Prizrenit,” thuhet në reagimin zyrtar të DokuFest-it.

DokuFest u bën thirrje institucioneve dhe qytetarëve që të mos e shohin kulturën si luks, por si pjesë thelbësore të identitetit dhe zhvillimit të qytetit. Organizatorët theksojnë se festivali është më shumë se thjesht një ngjarje.

“DokuFest nuk është vetëm një ngjarje. Është një investim në të ardhmen e qytetit tonë – ekonomikisht, kulturalisht dhe socialisht,” thekson reagimi.