Çmontimi i kërcënimeve serbe – Policia e Kosovës zbulon predhë antitank dhe uniforma ushtarake
Ministri i Punëve të Brendshme, Xhelal Sveçla, ka njoftuar se Policia e Kosovës vijon punën për çrrënjosjen e çdo elementi kriminal dhe terrorist të lidhur me Serbinë, në funksion të sigurisë së qytetarëve dhe mbrojtjes së Republikës së Kosovës.
Foto: Ilustrim
Mbrëmë, gjatë një patrullimi në një objekt të pabanuar në fshatin Donje Jarinje, njësitë policore kanë hasur uniforma ushtarake dhe xhaketa me emblema të Ushtrisë së Serbisë, si dhe një predhë antitank. Ky operacion tregon angazhimin e institucioneve për të parandaluar kërcënimet e mundshme ndaj sigurisë së vendit.
Sveçla theksoi se institucionet e vendit janë plotësisht të përkushtuara ndaj ligjit, sigurisë dhe mbrojtjes së sovranitetit dhe integritetit territorial të Kosovës. “Do të vazhdojmë pa u ndalur punën tonë në çrrënjosjen e çdo mbetjeje terroriste të Serbisë në vendin tonë. Çdo veprim që cënon sigurinë e qytetarëve tanë do të trajtohet me vendosmëri dhe profesionalizëm”, deklaroi ministri.
Policia e Kosovës ka bërë të ditur se operacionet e tilla do të vazhdojnë në të gjithë territorin, duke garantuar mbrojtjen e komuniteteve dhe stabilitetin e vendit.
