Burri në Prishtinë e përzuri nga shtëpia gruan bashkë me fëmijët – shpallet në kërkim nga Policia
Dhuna në familje po vazhdon të jetë një plagë e shoqërisë sonë, me gra dhe vajza që shpeshherë përballen me abuzim të heshtur nga personat më të afërt.
Së fundmi, në Prishtinë është raportuar një rast ku një grua ka gjetur forcën të denoncojë dhunën sistematike që pretendon se ka përjetuar nga bashkëshorti i saj gjatë 15 viteve të martesës.
Gazeta Sinjali raporton se denoncimi është bërë më 28 maj 2025, rreth orës 20:00, nga L.K., 37 vjeçare. Ajo ka deklaruar në polici se për më shumë se një dekadë ka qenë viktimë e dhunës fizike dhe psikike, por nuk kishte guxuar të raportonte më parë për shkak të frikës dhe presionit të vazhdueshëm.
Sipas dëshmisë së saj tronditëse, situata ka arritur kulmin tre javë më parë, kur bashkëshorti i saj, i dyshuari A.T., rreth 47 vjeç, e ka dëbuar me forcë nga shtëpia, së bashku me fëmijët e tyre, duke i lënë pa strehë. Dy ditë para se të merrte vendimin për të denoncuar, ai e kishte kërcënuar përmes telefonit, duke e rritur ndjenjën e saj të pasigurisë dhe frikës.
Viktima ka deklaruar se aktualisht po qëndron tek familja e saj dhe fatmirësisht nuk ka nevojë për trajtim mjekësor. Megjithatë, ajo ndihet thellësisht e kërcënuar dhe e pasigurt për sigurinë e saj dhe të fëmijëve.
Pas marrjes së denoncimit, Prokurori kujdestar për dhunë në familje është njoftuar menjëherë dhe ka urdhëruar inicimin e rastit si “Dhunë në familje”, si dhe kërkimin dhe ndalimin e personit të dyshuar, A.T.
Policia e Kosovës aktualisht është në kërkim të 47-vjeçarit, ndërsa hetimet lidhur me këtë rast të dhunës së gjatë janë duke u zhvilluar nga njësitet përkatëse. Ky rast shërben si një kujtesë e hidhur e sfidave me të cilat përballen viktimat e dhunës në familje dhe rëndësisë së denoncimit të akteve të tilla.