António Costa në Kosovë: Fokus në Dialogun me Serbinë në Vizitën Zyrtare
Presidenti i Këshillit Evropian, António Costa, pritet të mbërrijë sot në Republikën e Kosovës për një vizitë zyrtare në rajon, pas qëndrimit të tij në Beograd.
Vizita e tij në Prishtinë vjen në një moment të rëndësishëm, kur dialogu ndërmjet Kosovës dhe Serbisë mbetet në qendër të agjendës evropiane për Ballkanin Perëndimor.
Costa do të mbërrijë në Aeroportin Ndërkombëtar të Prishtinës gjatë pasdites, për të vazhduar më pas me takime të nivelit të lartë institucional. Në orën 16:30, ai do të pritet nga Presidentja e Republikës së Kosovës, Vjosa Osmani, në Zyrën e Presidencës. Pas takimit, është planifikuar të mbahet një konferencë e përbashkët për media.
Më pas, në orën 18:40, Costa do të zhvillojë një takim me Kryeministrin në detyrë të Kosovës, Albin Kurti, në ambientet e Zyrës së Kryeministrit.
Vizita e tij në Kosovë vjen pas deklaratave të bëra një ditë më parë në Beograd, ku Costa theksoi se “dialogu me Kosovën mbetet një nga kushtet kyçe për përparimin e Serbisë në procesin e integrimit evropian”. Ky mesazh tregon rëndësinë e vazhdueshme të dialogut për stabilitetin dhe integrimin e rajonit në Bashkimin Evropian.
