Albulena Haxhiu përkujton masakrën e Rezallës: Krimet nuk do të harrohen, drejtësia mbetet obligim
U.d. presidentja e Republikës së Kosovës, Albulena Haxhiu, ka përkujtuar përvjetorin e masakrës së 5 prillit 1999 në fshatin Rezallë, duke e cilësuar atë si një nga krimet më të rënda të kryera ndaj civilëve shqiptarë gjatë luftës në Kosovë.
Foto: Ilustrim
Përmes një postimi publik, ajo theksoi se në atë ditë, forcat e regjimit serb zbatuan një plan të qartë për shfarosjen e popullsisë shqiptare, ku u ekzekutuan civilë të pafajshëm nga mosha 13 deri në 90 vjeç.
Sipas saj, burra dhe djem u nxorën me forcë nga shtëpitë e tyre dhe u pushkatuan.Haxhiu gjithashtu theksoi se, në përpjekje për të fshehur krimin, trupat e viktimave u rrëmbyen dhe u zhvendosën në varreza masive në territorin e Serbisë.
Ajo nënvizoi se e vërteta për këto krime nuk do të lejohet të zhduket dhe se institucionet e Kosovës do të vazhdojnë angazhimin për drejtësi dhe zbardhjen e fatit të të zhdukurve.
Në përvjetorin e kësaj ngjarjeje tragjike, u.d. presidentja shprehu nderim të thellë për të gjithë të rënët për lirinë e vendit, duke theksuar se sakrifica e tyre mbetet themel i shtetit të Kosovës.
