AAK: Qeveria Kurti e ka rënduar shumë jetën e qytetarëve

Shefi i Grupit Parlamentar të Aleancës për Ardhmërinë e Kosovës, Besnik Tahiri ka thënë se Qeveria Kurti ua ka rënduar jetën qytetarëve.

Reagimi i Tahirit vjen pas konferencës së sotme të kryeministrit Albin Kurti me ministrin e Financave, Hekuran Murati duke shtuar se këta po vazhdojnë me mashtrime.

“Më la shumë përshtypje një mashtrim skandaloz që e bënë me qytetarët e Kosovës, ministri Hekuran Murati. Ai kërkonte që sektori privat t’i rrisin pagat për punëtorët sepse u është rritur fitimi. E, është vet personi përgjegjës, që e ka në dorë, me një rishikim buxhetor, me një ndërrim të një neni, ta rris koeficientin nga 105 në 129 euro, siç kemi rekomanduar si AAK dhe me i rritë pagat në sektorin publik për 80 mijë njerëz”, thuhet në reagimin e Tahirit.

Ai po ashtu thekson se Murati është një ministër që nuk ka bërë asgjë për sektorin privat.

“Është një ministër i Financave që nuk ka bërë asgjë për sektorin privat, për biznesin, për ekonominë, veçse ua ka rënduar jetesën, e veçse u ka qëndruar mbi kokë, tash e dy vjet e gjysmë”, përfundon ai.

Murati gjatë një konference për medie, ka kërkuar që bizneset duhet t’i rrisin pagat e punëtorëve duke pohuar se marzha e fitimit për shumë biznese është rritur dukshëm gjatë viteve të fundit.

“Kemi problemin e mos ofrimin e kushteve të punës nga ana e bizneseve, duke filluar që nga pagesat. Për shumë biznese, marzha e profitit është rritur, sidomos viteve të fundit, pra këtë e them nga të dhënat e konfirmuara, prandaj duhet të rriten edhe pagat e punëtorëve”, është shprehur Murati.

Ai ka shtuar se nga masat mbështetëse të Qeverisë për rritjen e pagave, deri më tani kanë përfituar rreth 17 mijë punëtorë.

“Ne si Qeveri i kemi bërë disa herë thirrje, kemi pasur masa mbështetëse edhe për rritjen e pagave, ku kanë përfituar rreth 17 mijë punëtorë edhe përmes platformës Super Puna”, ka përfunduar ai. /Telegrafi/