42 ndërmarrje në Kosovë përfitojnë grante për digjitalizim nga MINTI dhe partnerët ndërkombëtarë
Ministria e Industrisë, Ndërmarrësisë, Tregtisë dhe Inovacionit (MINTI), përmes Agjencisë për Investime dhe Përkrahjen e Ndërmarrjeve në Kosovë (KIESA), ka nënshkruar marrëveshje me 42 ndërmarrje përfituese në kuadër të Skemës së Granteve për Digjitalizim.
Foto: Ilustrim
Kjo skemë realizohet në bashkëpunim me projektin EnInGeP, i financuar nga Bashkëpunimi Austriak për Zhvillim (ADA), dhe synon të mbështesë ndërmarrjet mikro, të vogla dhe të mesme në përmirësimin e proceseve të tyre përmes zgjidhjeve digjitale.
Gjatë ceremonisë së nënshkrimit u theksua rëndësia e digjitalizimit për rritjen e konkurrueshmërisë së bizneseve në Kosovë, duke ndihmuar ndërmarrjet të rrisin efikasitetin, produktivitetin dhe inovacionin, si dhe të përshtaten me kërkesat e tregut modern.
Në këtë ngjarje foli edhe Rita Glavitza, Shefe e Zyrës së Bashkëpunimit Teknik – Zyra Rajonale pranë Ambasadës së Austrisë në Kosovë, e cila theksoi se kjo skemë paraqet një mbështetje të rëndësishme për zhvillimin dhe transformimin digjital të ndërmarrjeve vendore.
Shuma totale e kësaj faze të skemës së granteve për digjitalizim arrin në 150 mijë euro. Ndërmarrjet përfituese do të marrin grante nga 2 mijë deri në 4 mijë euro, varësisht nga shërbimet digjitale që planifikojnë të implementojnë.
