🚨Dalin pamjet e para nga burgu në Hagë ku po mbahen ish-krerët e UÇK-së

12.05.2026

Dhomat e Specializuara të Kosovës kanë publikuar për herë të parë pamje nga brenda qendrës së paraburgimit në Hagë, ku po mbahen ish-krerët e UÇK-së që po përballen me procese gjyqësore.

Në videot e publikuara shihen ambientet e brendshme të qendrës, përfshirë dhomat e qëndrimit, hapësirat për rekreacion, oborrin për shëtitje, sallat e aktiviteteve dhe pjesët ku të paraburgosurit mund të takojnë familjarët apo avokatët e tyre.

Sipas Dhomave të Specializuara, të paraburgosurit kanë qasje në ajër të pastër, aktivitete sportive, shërbime fetare dhe mundësi socializimi brenda qendrës.

Specialja ka bërë të ditur se masa e paraburgimit rishqyrtohet çdo dy muaj nga gjyqtarët, për të vlerësuar nëse vazhdon të jetë e nevojshme.