Gjermani, arrestohen 10 të dyshuar për kontrabandë me njerëz

Më shumë se 1,000 policë federalë dhe prokurorë publikë u përfshinë në operacion dhe u kontrolluan 101 ambiente banimi dhe biznesi, duke përfshirë dy firma ligjore, tha Drejtoria Federale e Policisë në Sankt Augustin pranë Bonit.

Duke përfituar nga rregullat e veçanta për punëtorët e huaj të kualifikuar, banda e dyshuar e kontrabandës mësohet se ka marrë leje qëndrimi për rreth 350 shtetas të huaj, kryesisht kinezë, në këmbim të shumave 5 dhe 6-shifrore euro.

Bastisjet u zhvilluan në North Rhine-Westfalen, Schleswig-Holstein, Hamburg, Berlin, Hesse, Rheinland-Pfalz, Baden-Württemberg dhe Bavari.

Sipas gazetës Bild, ka dyshime se punonjës të disa zyrave të emigracionit janë korruptuar.

Fokusi i hetimeve ishte në North Rhine-Westphalia, ku u arrestuan 10 të dyshuarit. Mes tyre ishin edhe dy avokatë. 

A konsiderohet vërtet kontrabandë marrja e lejeve të qëndrimit?

Në Gjermani ‘kontrabanda’ përkufizohet si akti i ndihmës së njerëzve për të hyrë ilegalisht në vend, zakonisht për para. Kjo përfshin ofrimin e shërbimeve të transportit, dokumenteve false, organizimit të udhëtimit ose akomodimit. 

Hyrja dhe qëndrimi i paautorizuar dënohen sipas Aktit të Vendbanimit. Kushdo që banon në vend pa lejen e kërkuar të qëndrimit duhet të largohet me ligj. Kontrabanda tregtare dënohet me burgim nga një deri në 15 vjet.

Në vitin 2022, Zyra Federale e Policisë Kriminale dhe Policia Federale regjistruan 4,936 raste të kontrabandës në Gjermani – një rritje prej gati 30 për qind krahasuar me një vit më parë. 

Vitet e fundit ka pasur një rritje të mprehtë të ’emigrimit të parregullt’ në Evropë. Në raportin për kontrabandën e vitit 2022 thuhet se autorët vepruan “me shumë profesionalizëm dhe fleksibilitet” dhe vunë re një gatishmëri në rritje të autorëve për të marrë rreziqe.