Prokuroria Speciale ndalon një person për 48 orë lidhur me “Rastin e njëmilionëshit”
Prokuroria Speciale e Republikës së Kosovës ka njoftuar se një person është ndaluar për 48 orë në kuadër të hetimeve që po zhvillohen lidhur me rastin e njohur si “Rasti i njëmilionëshit”.
Sipas njoftimit të Prokurorisë, ndalimi është bërë me urdhër të prokurorit të shtetit, ndërsa në bashkëpunim me Policinë e Kosovës po vazhdojnë veprimet hetimore për zbardhjen e plotë të rrethanave dhe sigurimin e provave relevante.
Prokuroria Speciale ka bërë të ditur se, për shkak se hetimet janë ende në zhvillim, në këtë fazë nuk do të publikohen detaje të tjera, me qëllim të ruajtjes së integritetit të procesit hetimor.
Institucioni ka ritheksuar përkushtimin për zhvillimin e hetimeve në mënyrë profesionale dhe të paanshme, duke respektuar të drejtat e personave të përfshirë dhe parimin e prezumimit të pafajësisë.
