Konjufca priti Përfaqësuesin Special të BE-së për Dialogun Kosovë-Serbi

23.02.2026

Zëvendëskryeministri i Parë dhe Ministri i Punëve të Jashtme dhe Diasporës, Glauk Konjufca, ka pritur në një takim njoftues Përfaqësuesin Special të Bashkimit Evropian për dialogun Kosovë-Serbi, Peter Sørensen. Gjatë këtij takimi, Konjufca e informoi Sørensen se procesi i dialogut tani do të udhëhiqet nga Ministria e Punëve të Jashtme dhe Diasporës.

Ata diskutuan rreth momentit aktual të dialogut, si dhe shkëmbyen pikëpamje mbi qasjen dhe parimet që do të sigurojnë një proces më efektiv dhe të qëndrueshëm. Konjufca theksoi angazhimin e Kosovës për të parë dialogun si mundësi për përmirësimin e marrëdhënieve fqinjësore me Serbinë dhe për përparimin e të dyja shteteve në rrugën e integrimit evropian.